Zorionak Iruñerriko gazteria!

Iruñerriko gazte mugimendua martxan da. Hala erakutsi genuen Atarrabian egindako topaketetan, norberaren hausnarketatik abiatu eta era kolektiboan gazte mugimendu berria eratzeko jauzia eman genuen. Behar genuen. Behar genuen elkartu eta hausnartu, behar genituen gure identitateak zalantzan jarri, gure harremantzeko eredua eraldatzeko pausu txikiak ematen hasi; behar genuen orain arte errepikatutako moldeak eta jarrerak ezbaian jarri. Behar genuen Iruñerriko, eta zehatzago, gazteriaren egoera aztertu eta horri aurre egiteko tresnak diseinatzen hastea, denon artean elkarlanean. Eta tamainan erantzun genion erronkari. Horregatik diogu, argi eta garbi, zorionak Iruñerriko gazteria!

Edonola ere, oraindik lan guztia daukagu egiteke. Gerora handiak izanen diren ekarpen txikiekin, denborarekin eta pazientziakin joanen gara elikatzen Iruñerriko gazte mugimendu berria. Eta horretarako, lehenbizi, garena eta izanen garena definitzeko beharra ikusi zen Atarrabiako topaketetan. Norbanako anitzek eta eragile ezberdinek osatutako mugimendu zabala bagara, nola harremandu eta komunikatu gure artean? Zein esparrutan eragin? Nola agertu mugimendu gisa? Horiek eta beste hainbat galdera erantzun behar ditugu, oinez jarraitu ahal izateko. Eta horiei erantzuna emateko elkartuko gara larunbat honetan, azaroak 12, Zizurreko Esparru gaztetxean, 17:00tan.Anima zaitez!

Advertisements

2.eguna bideoan

1.eguna bideoan

Hasi dira topaketak!

Arrakastaz eta ilusioz hasi dira Atarrabian Iruñerriko Gazte Topaketak. Auzo eta herri guztietako 150 gazte bildu gara lehenbiziko egunean, eztabaidaz, ekarpenez eta harremanez betetako hiru egunei hasiera emateko. Topaketen izaera eta filosofiaren adierazgarri izan den performance koloretsu batekin abiatu da eguna, arratsaldeko 6ak aldera. Geroxeago, bildutako gazteak haien arteko harremanetan sakontzeko eta elkar ezagutzeko aukera izan dute, aldi berean ederki pasatzeko balio izan duten jolasen bitartez. Bokata goxoak jateko ordua izan da ondorengoa. Gauez, hiru txoko ezberdin prestatu dira jendeak aukeran parte hartzeko: ikusentzunezko emaldiak eta horien inguruko eztabaida bultzatzeko gunea, masaiak jaso/eman eta koltxoietan goxo eta lasai egoteko txokoa eta Iruñerriko gazte mugimenduaren aldaketak eta bilakaeraren inguruko hausnarketa jasoko duen gunea. Hau martxan dago! Oraindik hurbildu ez zareten guztiek badakizue, Atarrabian ikusiko dugu elkar! Bihar gehiago!

Topaketen inguruko albistea Gara-n

Hemen duzue, gaur, urriak 19, Gara egunkariak topaketen inguruan kaleratutako albistea. Egin klik irudi gainean handiago ikusi ahal izaeko.

Aquí tenéis el artículo sobre las topaketas que el diario Gara ha publicado hoy, día 19 de octubre. Haz click sobre la imagen para verla más grande.

Oraindik ez dakizu agertu ala ez agertu?

Ate joka dauzkagu Iruñerriko Gazte Topaketak. Ia dena prest dago Atarrabian, baina denon ilusioa, ekarpena eta parte hartzea falta da. Halere, baliteke oraindik agertzeko zalantzak dauzkan jendea egotea. Argitu ditzagun hainbat kontu.

Ez dakizu zure lekua ote den? Asteburu honetan Atarrabian ospatuko diren gazte topaketak erabat irekiak dira. Hori esaten dugunean ez gabiltza parte hartzerako eskaintza bat besterik egiten ari. Topaketak irekiak izatea helburu bat da bere horretan. Zergatik? Bada, era guztietako gazteak agertzeak aberasgarriago eginen duelako eztabaida, zalantzarik gabe. Orain arte Iruñerriko gazte mugimenduan lanean ibili diren gazteak zein ibili ez direnak batu nahi ditugu, era horretan bakarrik lortuko baitugu egungo Iruñerriko gazteriaren analisi erreala. Zure iritziak, zure ekarpenak, zuk dituzun sentsazioak beste edozeinenak bezain beste balio du. Beraz, ez eduki beldurrik horri, topaketak zure lekua dira! 

Ezin zara denera agertu? Ez kezkatu. Topaketek hiru egunetako iraupena dute (ostiral, larunbata eta igandea) eta han lotan gelditzeko eta otorduak jasotzeko aukera egonen da. Hala ere, oso ulerkorra da jende batek hitzaldi, eztabaida edo tailer konkretu batzuetara bakarrik agertu ahal edo nahi izatea. Hala bada ez dago arazorik, topaketen ateak erabat irekiak daude nahi duzuenean parte hartzeko.

Ez dakizu merezi duen asteburua honetan ematea? Urteko asteburu guztiak ditugu parranda egiteko, mendira joateko edota beste mila gauza egiteko. Ezin dugu asteburu bakar bat erabili Iruñerriko beste gazteak ezagutzeko eta  gure egoera konpartitzeko? Asteburu honetan konturatuko gara badaudela ongi pasatzeko eta sentsazio ederrak bizitzeko beste moduak!

Arrazoi hauek, eta topaketen egitarauak, asmoak, filosofiak… oraindik ez bazaituzte konbentzitu, ez da behar agertzea. Baina bestela ez duzu aitzakirik! Eta zalantza gehiago baldin badituzu, utzi lasai hemen zure komentarioa, eta erantzungo dizugu!

Asteburuan Atarrabian ikusiko garelakoan, jaso besarkada beroa! Animo Iruñerriko gazteria!

Larunbatean, asanblada orokorra + bazkaria + auzolana

Topaketak ate joka dauzkagu, eta inoiz baino gehiago, denon laguntza behar dugu dena ongi prestatzeko. Horregatik, larunbat honetan, hilak 15,  Atarrabian elkartuko gara laguntzeko prest gauden guztiak. Goizeko 11tan jarri dugu hitzordua, Etxebetza elkartean. Asanblada orokorra eginen dugu goizean, prestatu behar dugun guztiari errepaso egiteko, eta horren ostean elkartean bertan bazkalduko dugu. Arratsaldea auzolana egiteko baliatuko dugu, denon artean dekorazioa eta bestelakoak prestatzeko. Agertu zaitez! Denon laguntza ezinbestekoa da!